You Are Here: Home» angoram , aron kami , edukesen , gut , is sepik provins , kokoubus , komuniti , kumun , lain , lo , maprik , nidipole , nius , sosel , tumbuna , wes yangoru » Wes Yangoru Pipel no Kisim Gavman Sevis

WES YANGORU (IS SEPIK) - Ol pipel bilong Winge insait long Wes Yangoru eria i kamap olsem sokabol namel long Maprik na Angoram distrik. Ol i kisim hevi bilong tupela distrik we i no givim helt na edukesen sevis bilong ol pikinini wantaim ol arapela sosel sevis.

Ol Wakupma pipol insait long Wes Yangoru eria i kamapim dispela bel kros bilong ol na tok, ol i stap long boda bilong Maprik na Angoram distrik na tupela gavman i save sutim pinga i go i kam na i no save sevim ol gut long ol besik sevis ol i nidim tru.

Mausman bilong ples na kaunsela, Aron Kami i tok, ol pipel i no save kisim ol dispela sevis long longpela taim i go pinis. Wanpela bilong tupela distrik olsem Angoram na Maprik ilektoret i no save traim long givim ol sevis ol Wes Yangoru pipel i nidim.

Ol pipel bilong Winge wantaim ol lain i stap namel long Angoram na Maprik distrik i komplen olsem, long longpela taim tru gavman bilong tupela distrik i no luksave long ol, long wanem, tupela distrik i sutim pinga i go i kam na long namel ol manmeri i pilim pen na kisim bagarap na stap. Ol Winge pipel i tok, wanpela plen bilong kirapim hai skul i bin kamap, tasol wok politik bilong tupela distrik i bin pasin rot.

Ol i tok, long hevi bilong wok politik ol manmeri i save kisim hevi long sindaun bilong ol. Kaunsela Aron Kami i tok, Wewak taun haus sik i stap longwe tru long Wes Yangoru eria, na planti taim ol sikman i save dai namel long rot taim ol i laik i go long hausik. Planti manmeri i lusim laip bilong ol pinis, long wanem, em i longwe tru.

Long dispela as, ol i laik wanpela hausik i mas kamap long hap bilong ol na stretim dispela hevi. “Wes Yangoru eria tasol i gat populesen olsem 15 i go 20 tausen pipel olsem na ol i singaut long Angoram na Maprik distrik i mas kamap long wanpela mak long sevim ol pipel bipo long olgeta manmeri i dai,” Kaunsela Kami i tok.

Ol pipel i komplen olsem gavman i no bin givim wanpela besik sevis i go long ol long sait bilong helt, edukesen na arapela sosel sevis. Ol pipel i wari tu olsem, ol pikinini bilong ol i save wokabaut longwe long kisim save long hai skul, tasol long namel ol i save bungim bikpela hevi. Ol i laik wanpela hai skul i mas kamap long hap bilong ol tu.

Taim gavman i kamapim ol dispela sevis, em bai helpim ol Wes Yangoru pipel wantaim ol pipel bilong 4-pela kaunsel divisen olsem Kumun, Nidipole, Koboubus na Winge eria. Ol pipel i wari olsem, ol i stap namel tru na tupela gavman i no save givim sevis long ol. [WantokNiuspepa]

No comments:

Post a Comment