You Are Here: Home» bebi , helt , helt dipatmen , michael malabag , pascoe kase , pot mosbi , tumbuna » Susu Bilong Mama i Nambawan Long Bebi

POT MOSBI - Ol Mama long dispela kantri i mas givim susu bilong ol long bebi, olsem nambawan kaikai long strongim bodi na stopim sik. Dispela em strongpela toktok i bin kamap long las wik taim Helt Dipatmen i lonsim PNG Nesenal Helt Wik i bin stat long dispela wik Mande na bai pinis long tomora, Fraide Ogas 23.

Helt Sekreteri, Pascoe Kase, i tok bikpela tingting bilong Nesenel Helt Wik em i toktok long dispela, na em i autim bikpela tok tenkyu long midia long kisim ol toktok na skul awenes long ol helt isu i go aut, long pipel, komyuniti na kantri.

Na em i tok ol nius lain i save mekim bikpela wok long autim toksave i go long ol pablik, na dispela em i gutpela samting tru. Midia i stap yet olsem strongpela patna insait long kamapim nesen na Helt Sekta i amamas, long wanem wok ol midia lain i save mekim wantaim ol gutpela stori na bringim aut ol wok bilong helt sekta i kamap klia long ol niuspepa na ol redio na TV.

Minista bilong Helt, Michael Malabag i tok, long Papua Niugini, i no planti mama nau i save givim susu bilong ol long bebi bilong ol. Planti i no save bihainim gutpela pasin bilong givim susu bilong mama long bebi insait long 6-pela mun taim bebi i bon.

Ating ol i save givim botol na susu bilong mama wantaim na tu givim kaikai wantaim susu taim ol i liklik tumas yet. Minista Malabag i tok i mas gat moa toksave na bai 60 pesen o moa ol mama bai stat long givim susu long bebi.

“Yumi no laikim ol pikinini bilong yumi bai bun nating o i no gro gut long sais. Na yumi no laikim ol pikinini bilong yumi i dai bipo long ol i kisim 5 yia bilong ol bikos ol i no kisim gut susu na gutpela kaikai,” Mista Malabag i tok.

Papua Niugini i gat bikpela namba bilong bebi i save dai long taim bilong karim na bipo long ol i kisim yia 5. Namba wan we tru bilong daunim dispela hevi em long ol mama i mas givim tasol susu bilong mama long bebi long taim mama i karim i nap tupela yia moa na i ken bihainim laik bilong pikinini.

“Ol pren, namba 5 PNG helt wik i bringim yumi i kam bung wantaim get long glasim moa dispela samting na yumi wanwan i mas stori moa long em insait long ol haus bilong yumi, wok ples na long ol haus sik bilong yumi. Mi tokaut pinis long olgeta haus sik na ol helt opis olsem long 19 i go 23 Ogas, olgeta helt lain i mas opim dua bilong ol long komyuniti ol i save helpim long wokim ol medikal sekap, toktok bilong gutpela helt, banis sut na toktok long mama i mas givim susu bilong em tasol long bebi,” Mista Malabag i tok.

Long wankain taim, Mista Kase i tok, “Toktok bilong helt em i wok bilong olgeta lain. Olgeta wanwan korporet orgenaisesen, ol pablik institusen na gavman long kain kain level olgeta i mas wanbel . Sapos yumi i no tingting gut long helt bilong ol pipel long wok ples bilong ol, bai yumi bungim bikpela moa hevi taim ol i painim sik na bagarap.” [WantokNiuspepa]

No comments:

Post a Comment