Givim Bek Pawa Long Hailens LLG

HAGEN (WESTEN HAILENS) - Dairekta bilong Nesenel Rises Institut (NRI)Dokta Thomas Webster i singaut long Ilektorel Komisina Andrew Trawen long rausim desisen bilong em long kenselim 19 LLG long Hailens provins. Dokta Webster i tok disisen bilong Mista Trawen i no beis long gutpela polisi na lo na mekim wanman disisen na abusim pawa na atoroti bilong Sif Komisina. Dokta Webster i tok no gat lo long Mista Trawen long bihainim long kenselim ileksen. Em tok lo i no tok klia long Ilektorel Komisina bai kisim tok orait long husat stret long kenselim ileksen na dispela ken mekim Komisina Trawen i mekim wan man disisen na abvsim pawa. Mista Trawen i tok em i no inap senisim disicen em mekim long las wik long kenselim 19 LLG long Hailens. Na em i givim tok lukaut long ol lidas bilong Hailens na PNG long rspektim lo na no ken mekim kain kain samting long kirapim hevi long disisen em bin mekim. Mista Trawen tok disisen bilong em i fainel na em bai no inap senisim. Em tok sapos ol kendidet, sapota na lida bilong wanpela LLG long kantri i egensim disisen bai lukim dispela LLG bai i no inap holim ileksen long bihaintaim. Las Wik Mista Trawen yusim pawa bilong em aninit long seksen 97(1)bilong Ogenik lo bilong Nesenel na Lokel-Level Gavman Ileksen na kenselim 19 LLG long sikspela hailens provins. Dokta Webster i tok Komisina Trawen i no kisim etvais na ripot bilong Provinsel Ileksen Menesmen Komiti. Em tok ileksen long PNG em dia na gavman yusim bikpela milien kina. Dokta Webster i tok Mista Trawen i no laik kenselim ileksen long taim bilong poling sapos gat bikpela hevi kamap. Em tok kaunting kamap na planti sia ol tokaut long wina pinis na gat liklik taim tasol long pinisim olgeta kaunting na tokaut long wina. Dokta Webster i tok em bai hat long kamapim ileksen gen long ol dispela LLG na singaut long mista Trawen long rausim disisen bilong em. Sikspela provins em Enga, Westen Hailens, Jiwaka, Isten Hailens,Sauten Hailens na Hela. Mista Trawen i tok, em kisim planti ripot bilong vailens, pretim fridom bilong vota, haijekim na bagarapim ol balot bokis na pepa, pait, bagarap kamap long poling ples, ol vota givim giaman nem long taim bilong vot, nogat fridom bilong ol meri long vot na planti trabel tru i kamap. Ol LLG Trawen kenselim em, ENGA(Kandep, Wage), WESTEN HAILENS (Hagen Aben, Hagen Rurel, Mul, Kotna, Muglamp), JIWAKA( Not Wagi, Saut Wagi, Anglimp) ISTEN HAILENS (Goroka Aben, Gahuku, Lowa Bena, Lowa Asaro), SAUTEN HAILENS(Ialibu, Mendi,Poroma), HELA(Tari Abem) Wankain taim Ritening Opisa bilong Mulgamp LLG long Westen Hailens Las Aki i tok Muglamp na Dei distrik i no bin gat trabel na ileksen bin ron gut. Em i tok kaunting go orait na i gat 11 moa wod long tokaut long wina. Ritening Opisa bilong Hagen Rurel, Willie Ropa i no amamas long dispela disisen. Em tok nogat wanpela ripot bilong ileksen menesa bilong WHP go long Mista Trawen long bikpela trabel. Westen Hailens Ileksen Menesmen Komiti kam pinis long Mosbi long toktok wantaim Ilektorel Komisina long rausim disisen bilong em. [WantokNiuspepa]

Share 2 FB Share 2 TW Share 2 WA Share 2 G+