You Are Here: Home» australia , lo , nius , pot mosbi » Indonesia loa i kilim dai pinis tupela drug smuggler blong Australia

POT MOSBI - Justice sistim blong Indonesia ibin kilim dai pinis tupela drug smuggler blong Australia, Andrew Chan na Myuran Sukumaran.

Oli ibin sutim dai Chan 31, na Sukumaran, 34 long prison ailan blong Nusakambangan long eli moning tede wantaim sixpela ararala prisina long death row kalabus.

Myuran Sukumaran na Andrew Chan tupela i hap blong wanem ol i kolim Bali-9.

Dispela em i grup blong 9 pela pipol husat ol otoriti long Indonesia ibin arestim ol long Bali long April 17, 2005 long drug trafficking.

Ol ibin traim long smugglim oa kisim hait moa long 8 kilogram blong heroin i kam long Australia.

Fopela long ol, ol i arestim long Denpasar airport wantaim ol paket blong heroin ol i strapim raun long bodi blong ol. Tripela long ol, ol ibin arestim long Maslati Hotel wantaim 300 gram blong heroin.

Tupela Andrew Chan na Myuran Sukumaran -  ol i arestim long Denpasar airport.

Long naba 22 long August 2005, ol Australian Federal Police i kam aut na tok klia olsem ibin givim informesen  long ol Indonesian police long mekim ol arrest ia - maski ol i save igat death panalty long Indonesia long ol drug offense.

Namel long October 11 na October 14 long 2005, keis blong olgeta pela Bali-9 i kamap long kot.

Long February 13, 2006 tupela Bali 9, Renae Lawrence na Scott Rush, Denpasar district court i kalabusin tupela long laif.

Long February 14, 2006 Denpasar district kot i painim Andrew Chan na Myuran Sukumaran guilty long drug trafficking, na tupela bai kisim death penalty firing squad.

Kot i lukim olsem tupela i bos blong ol drug mugller ia na i givim ol moni, peim ticket blong na hotel blong ol.

Kot i sentensim tu Michael Czugaj na Martin Stephens long liftaem.

February 15, 2006 kot i painim Matthew Norman, Si Yi Chen na Tan Duc Thanh Nguyen gilty na kalabusim ol long laif.

Long September 2006, kot i rausim appleal agensim death sentence blong Andrew Chan na Myuran Sukumaran. Australian Prime Minister long taim ia, John Howard itok em i no laik interfere taim keis blong ol i stap long han blong kot.

Tasol long July 27, 2007 John Howard ibin toktok wantaim Indonesian president long taim ia, Susilo Bambang Yudhoyono, na tokim em olsem  issiu blong ol Bali-9 igat bikpela interest long Australia.

Long August 13, 2010 Andrew Chan na Myuran Sukumaran i putim judicial review request long death sentence blong tupela.

Tupela i tok tupela i sori long kraim blong tupela na i askim forgiveness oa marimari.

Long May 11, 2011 Indonesian supreme court, i daunim death sentence blong Scott Rush wanpela long ol Bali - 9 ikam daun long liiftaem.

Long June/July 2011, Supreme Kot  i rul olsem i nogat wanpela samting i rong long death penalty blong Chan na Sukumaran, na tupela i mas dai long firing squad.

Insait long 2012, tupela Andrew Chan na Myuran Sukumaran ibin askim marimari long President blong Indonesia.

Long December 11, 2014 niupela President blong Indonesia, Joko Widodo itok, em bai no soim marimari long ol husat ol i kalabusim long ol drug crime.

President Widodo ibin tok long February dispela yar olsem, dicisan blong death penalty em i blong kot, ino blong president. Na em i tok, president bai no givim marimari long ol drug ofenda.

Stat long January dispela yar ikam inap long aste, gavman blong Australia  na tu Praim Minister Tony Abbott na Foran Minista Julie Bishop, ibin traim had long stopim exekiusen blong tupela man blong Australia ia.

Olgeta legal wok blong ol loia blong Chan na Sukumaran long stopim execiusen ia, ol i fail tu.

Na olsem yumi save pinis, Andrew Chan na Myuran Sukumaran ibin dai nau long firing squad wantaim sixpela arapela long death row kalabus, long Nusakambangan island long central Java - eli dispela moning.

Narapela meri blong Phillippines Mary Jane Veloso, ol i givim last minit marimari na ol ino kilim.

Tupela nait pastaim long ol i kilim dai. Chan ibin maritim gelfren blongen Febyanti Herewila long wanpela ceremony insait long prison.

Long ol laspela dei blongen, Sukumaran ibin paintim o artwork em i kolim The second last day na One Heart, One Feeling in Love.

Olgeta 9 pela prisina long we i fesim firing quad wantaim tupela blong Australia ia nau i sainim ol painting ia.

Bodi blong tupela Myuram Sukumaran na Andrew Chan, bai ol i kisim kam bek hom long Australia. [RadioAustralia]
Tags: australia , lo , nius , pot mosbi

No comments:

Post a Comment