Katolik Bisop Konprens harim tok bilong Nuncio

POT MOSBI - Katolik Bisop Konprens (CBC) bilong Papua Niugini na Solomon Ailan i bin holim enuel jeneral miting bilong ol long dispela wik we bai pinis tude.

Long Sarere 18 Epril, ol bisop na Asbisop i bin harim toktok bilong Asbisop Michael W. Banach, husat em i Apostolik Nuncio, i makim opis bilong Pop long Papua Niugini na Solomon Ailan.

Asbisop Banach em i bringim toktok bilong Pop Francis, het bilong Katolik Sios olsem dispela yia 2015 em i yia bilong wok marimari.

Em i bringim toktok bilong Pop i kam long ol bisop bilong PNG na Solomon Ailan olsem, taim em i bin bungim Pop Francis long yia i go pinis, Pop i bin salim gutbel toktok long ol.

“Mi bin bungim Pop Francis long yia i go pinis na em i tokim mi long tokim yupela olsem, yupela i no stap yupela yet long mekim ol strongpela wok misin bilong yupela long helpim ol pipel, skulim ol long Gospel na long mekim wok bilong Sios long PNG.” Asbisop Banach i tok.

Em i tokaut olsem 2016 Wol Yut Dei bai kamap long Krakow, Polan long 25 i go 31 Julai. Bikpela tingting bilong Wol Yut Dei em bai ‘Ol manmeri bel bilong ol i klin, em ol i ken amamas. Bai ol i lukim God,” Matyu 5:8.

Wanpela bikpela toktok Nuncio i  wokim em long dispela yia em i yia bilong  ‘Yumi kisim Marimari’.

Em i tok olsem long namba tu sande bilong Ista o Divine Mercy, Pop Francis i bin tokaut long “Ekstraodineri Jubili bilong Marimari’ Holi Yia. Dispela yia bai stat long Desemba 8 taim ol Holi Dua i op long Basilica bilong Santu Pita na em bai pinis long 20 Novemba 2016.[WNP]
Share 2 WA Share 2 G+

0 comments:

Post a Comment