Wapenamanda sainim Distrik Yut Plen

Wapenamanda Distrik Yut bai go pas long yusim Enga Provinsel Yut Plen, bihain long memba bilong ol i sainim agrimen wantaim Nesenal Yut Komisin long Tunde 6 Ogas.

Bihain long ol i sainim agrimen, insait long B Wing Konprens Senta bilong Haus Palimen, Foren Afeas Minista na Memba bilong Wapenamanda, Rimbink Pato, i tok em i bin toktok planti wantaim Minista bilong Yut na Nesenal Yut Komisin long wanem kain we bai ol yut long distrik bilong em i ken kisim helpim aninit long 5 yia Yut Divelopmen Polisi bilong nesen.

“Mi tenkyu long Yut Minista na Komisina long harim wari bilong mi na nau mipela sainim dispela agrimen,” Minista Pato i tok.

“Wapenamanda em i getwe bilong Enga Provins, na mi tenkyu long Yut Komisin i sanap baksait long divelopmen bilong em. Getwe distrik i mas putim olgeta strong bilong em long senisim lukluk bilong em long soim gutpela piksa bilong provins,” em i tok moa.

Em i tok, distrik bilong em i gat planti yut na i nidim sampela gutpela samting long surukim ol i go het long kirap na mekim wok long olgeta rurel divelopmen. Yut Kominisa, Norit Luio i tenkim Minista Rimbink na gavman bilong Peter O’Neill long sapot ol i givim i kam inap nau long helpim ol yut insait long nesen.

“Mi amamas tru long minista i givim taim bilong em long kam na sainim dispela agrimen pepa. Em i soim tru olsem yu gat bikpela tingting long distrik bilong yu, olsem wanpela memba bilong gutpela gavman,” Mista Luio i tok. [WantokNiuspepa]
Share 2 WA Share 2 G+

0 comments:

Post a Comment