PM givim K50m moa long Nesenel Kepitol Distrik Rot

Bikpela divelopmen bai kamap long rot wok long Nesenel Kepitol Distrik long mekim ron bilong kar isi na daunim hevi bilong trefik jem we i wanpela bikpela hevi tru long Mosbi siti nau. Long daunim dispela ol hevi, Moto Vikel Insurens Limited o MVIL i givim K50 milian long helpim NCD long stretim rot na mekim ol nupela rot long siti long opim trefik jem insait long siti.

Praim minista Peter O’Neill, long makim maus bilong MVIL i tokaut long K50 milian we bai kam long MVIL long helpim Mosbi siti rot na givim giaman sek long NCD gavana Powes Pakop na Mosbi Not Wes memba, Michael Malabag na Mosbi Saut memba, Justin Tchencko long dispela wik Mande long Palamen haus.

Praim Minista O’Neill taim tokaut long K50 milian, i tok bikpela divelopmen bai long ol rot wok na long ol arapela infrastaksa divelipmen long Mosbi siti long kantri ken stretim siti long bungim bikpela intanesenel bung bai kamap long 2015 Pasifik Gems na 2018 APEC miting.

Long dispela Mista O’Neill tok klia olsem nesenel gavman bin tokaut long mani mak long K100 milian long NCD rot long 2013 baset na dispela K50 milian bilong MVIL em kam insait long 2013 baset bilong gavman. Long dispela yia yet Nesenel Fiseris Atoriti o NFA bin givim K50 milian long NCD rot.

Wankain taim, long namba 4 mun long dispela yia taim praim minister O’Neill tokaut long K50 milian long NFA long sapotim NCD rot bin tokaut tu long Nesenel Eksektiv Kansol disisen long K400 milian long mekim tupelo bikpela nupela rot long Moisbi long daunim hevi bilong trfik jem na redi long 2015 Pasifik Gems na 2018 APEC miting. Dispela tupela nupela rot em ol givim long tupela kontrakta bilong kantri Saina.

Narapela rot em bai long 9 mail i go long Morata na narapela em bai long Erima i go long 9 mail. Dispela bai opim rot na ol kar bai skelim go kam long yusim dispela rot na bai skelim o opim insait rot long siti na trefik jem bai kam daun. Long wankain taim, Praim Minista O’Neill tokaut olsem nesenel gavman i givim K15 milian long mekim stadi long surukim Hailens Haiwe go long nupela rot.

Dispela seksen bilong Hailens Haiwe em long Asaro long Isten Hailens i go long Kerowagi long Simbu provins na long Watarasi long Morobe go long Kainantu long Isten Hailens. Mista O’Neill tok moa olsem gavman bai putim moa mani long 2014 baset long stretim ol rot insait long siti na long Hailens Haiwe na tu long ol arapela bikpela haiwe long kantri.

Wankain taim oposisen I tok strong olsem gavman I wok long yusim bikpela pablik mani long NCD rot na planti rot olsem hailens haiwe na tu ol arapela infrastraksa long planti distrik I go bagrap na gavman I no lukluk long stretim. [WantokNiuspepa]
Share 2 WA Share 2 G+

0 comments:

Post a Comment