Ol Toktok long Manus Asailum Agrimen Dil

POT MOISBI - Planti toktok i kamap nau long Australia na PNG long agensim pasin we Australia i mekim long salim ol asailum sika o pipel i ronawe lusim kantri bikos long woa na hevi, na ol i laik go sindaun long narapela seif kantri, i kam long PNG. Stat yet long las wik taim Praim Minista bilong Australia, Kevin Rudd na wanwok bilong em long PNG,

Praim Minista Peter O’Neill, i bin sainim agrimen long Australia bai salim olgeta bot pipel i laik go long Australia i kam long PNG na sapos ol i glasim ol na painim olsem ol i tru tru refuji, ol bai sindaun long PNG, ol toktok i pairap i go i kam long Australia na PNG we i autim ol komplen olsem pasin Australia i wokim i no stret long tromoim hevi bilong em i kam long PNG. Long PNG, ol sios na sampela Non Gavman Ogenaisesen i no amamas na tok long sosel, humeniterien na humen rait sait, em i no stret.

Daunbilo em sampela ol toktok : “PASIN long lukluk nogut olsem ol i rabis (injustice) long narapela bilong gavman bilong Australia em gridi pasin bilong PNG Gavman i haitim. PNG na Australia i gat samting i wanbkain na yumi ken hangamapim het wantaim sem i go daun long pasin we ol politikel lida bilong yumi i wokim.

“Australia i ting olsem yusim sekbuk i ken stretim bikpela humeniterien hevi em i gutpela na stretpela rot long daunim hevi bikos dispela i ansa bilong ol bega. Long ol PNG lida i go daun olgeta na salim rait we mama i karim ol long mani i samting bilong sem long en. Nogat pablik dibet, nogat dibet long Palamen, dispela i soim hangere long pawa,” Pater Philip Smith bilong Divain Wod Yunivesiti i tok.

“O’NEILL gavman i mas lusim tingting long hevi we ol pipel bilong Manam Ailan i bungim bikos ol i nogat graun long bildim haus bilong stap long en, kisim ol sevis olsem skul na helt. Bai gavman i lukautim ol refuji bilong ausait sapos ol i no lukautim ol lain bilong em yet. Rudd gavman i laik hariap long stretim hevi long boda, tasol agrimen we Australia na PNG i sainim i no gutpela long ol turangu lain na sosel hamoni o gutpela sindaun bilong PNG,” Bruder Peter Ryan fsp long Wewak, Is Sepik , i tok.

“Tru, PNG i gat lewa long ol lain i stap long hevi, PNG i nogat inap samting long sindaunim na lukautim planti ol refuji bilong ausait, husat bai laik sindaun long gutpela hap na go hetim laip bilong ol,” Konprens bilong Katolik Bisop i tok.

Praim Minista O’Neill long aste i mekim klia olsem manimak we agrimen namel long tupela praim minista i kamapim em long K740 milian bai go long stretim Angau Memoriel Haus sik, K500 milian long ribildim ol bikpela skul long kantri, K300 milian long apgretim Ramu Haiwe na K100 milian bilong bildim Distrik Kot bilding. [WantokNiuspepa]
Share 2 WA Share 2 G+

0 comments:

Post a Comment