You Are Here: Home» bisnis , lae , madang provins , nius , politik , ramu nico » Bikpela Milien Kina Bagarap long KBK Main

LAE (MADANG) - Namba wan nikel/kobalt main projek bilong PNG long Madang provins, Ramu NiCo Projek i bin pasim wok bilong en long Mande moning bihain long ol asples i go insait long main eria na bagarapim na kukim ol samting we i kost moa long planti milien Kina.

Bikpela bagarap tru i bin kamap taim ol man bilong ples i go kukim ol masin bilong digim graun na tu ol arapela samting long hap na pretim laip bilong ol wokman. Prodaksen i stop olgeta na bikpela milien Kina i lus nau.

Ripot i kam long Ramu NiCo Menesmen (MCC), divelopa bilong Ramu Projek, i tok dispela birua i bin kamap long samting olsem 8:30 long moning taim wanpela bikpela grup i go insait long opis eria bilong KBK Main sait na stat long bagarapim ol samting na kukim ol masin na ronim na paitim sampela ol wokman bilong Saina long hap.

“Faivpela Saina wokman i bin kisim bikpela bagarap long bodi bilong ol na wanpela em dokta i samapim 14 tret long em,” ripot bilong KBK Main i tok.

“Stat long Mande moning yet i kam, main operesen em kampani i stopim inap sampela taim (saspen) inap polis i holimpas na bringim ol lain i kamapim bagarap i go long han bilong lo,” ripot i tok.

Ol bikpela samting long wok maining we i paia na bagarap em 9-pela ekskeveta, wanpela fiuel trak, wanpela bikpela kar wantaim lait.

Ol arapela bagarap i kamap long maining ikwipmen eria, fiks mentenens eria, instramentesen plen, leboratori, komyuniti afeas (CA) opis, main opis bilding na mobail mentenens woksop.

Bikpela bagarap tu i bin kamap long ol masin long opis olsem komputa, printa na ol dua na windo bilong ol opis, ol tu-wei redio na ol opis telepon.

Dispela i lukim olsem kampani i lusim planti milien Kina tru.

Kampani menesmen i kamapim wanpela imejensi miting na kamapim wanpela plen long putim kamap sefti bilong ol wokman na ol samting bilong wok na ol arapela plen bilong polis long go kamap na was long eria.

Presiden bilong Ramu NiCo, Wang Jicheng i bin go long KBK long Mande long lukim ol bagarap i kamap na i givim toktok long menesmen tim long KBK long bringim bek nomal wok long kamap long main sait na tu wok painimaut i mas kamap na ol lain i kamapim birua i mas go long han blong lo.

Wanpela bikpela wok painimaut bai kamap insait long ol de i kam long lukluk insait long as tru bilong hevi. Tasol wanpela luksave i kamap olsem sampela ol lain husat i no papagraun tru i no amamas long rikrutmen polisi bilong kampani na i go pas long ogenaisim dispela bagarap i kamap long Mande moning.

Kampani insait long ol wik pastaim i go long plen long kamapim sampela vokesenel trening bilong ol papagraun na taim dispela i kamap taim kisim ol save lain bilong autsait long kam wok na karamapim ol eria we i nidim wokman. Dispela bai i ken bringim ap prodaksen.

Ramu NiCo i tok em bai go het yet long kamapim gutpela pasin bilong wok-bung namel long Projek papagraun long lukim gutpela helpim i ken go daun long ol papagraun na projek seaholda. [WantokNiuspepa]

No comments:

Post a Comment