Skul Pastaim na Olgeta Samting Bai Orait Stret

LAIGAIM POGERA (ENGA) - Dispela song bilong Hitsi Golu, “Pinisim skul pastaim na em bai rait olgeta,” em i sutim stret tingting bilong wanpela meri bilong liklik asples Mulitak insait long Laigam Pogera Distrik, Enga provins. Loretta Rato i gat bikpela tingting olsem marit, karim pikinini na kamapim famili em i no namba wan tingting bilong em.

Em i laik pinisim skul pastaim na olgeta samting bai rait olgeta. Loretta, pikinini bilong wanpela skul tisa bai lusim kantri neks wik Mande na go long Saina long stadi inap long 4-pela yia, stat long Septemba dispela yia.

“Marit em las samting. Mi laik go ovasis, stadi, kamapim nupela tingting na save na kam divolopim kantri bilong mi,” Loretta i tok.

Wanpela ogenaisesin ol i kolim Edukesen Pasifik Ejensi (EPA) i rekomendim na painim skul na sponsa bilong Loretta long go skul long Northeastern Universiti long Shengyang siti.

Loretta em i bin pinisim digri bilong em long 2008 long Univesiti bilong PNG long Pot Mosbi long Biochemistry na long Saina bai em i mekim Masta digri long Physical Chemistry bihain long wanpela yia stadi long tokples Saina. “Papa na mama bilong mi save givim strongpela skul toktok long wok hat na kisim moa save na bihain wok. Mi bin weitim dispela sans na nau mi amamas,” Loretta i tok.

Loretta em i no pret long tokples bilong Saina na kain kain kalsa pasin bilong ol long wanem meri ya i bin wok wantaim Ramu NiCo long Madang, kampani bilong ol Saina na save liklik long haphap tok Saina na pasin na kalsa bilong ol. “Taim bilong mi wantaim Ramu NiCo i helpim mi long planti samting na em bai helpim mi planti. Ramu NiCo i amamas olsem mi bai go skul na ol i givim sapot bilong ol,” em i tok Loretta i bin wok olsem wanpela Laboretri Teknisin long Basamuk Rifaineri long stat long mun Septemba 2011 i kam inap mun Julai long dispel yia.

“Taim mi bungim birua olsem tokples Saina long wok ples, dispela i givim mi bikpela tingting na strong long go long Saina na stadi long tokples na pasin blong wok so em bai helpim mi bihain taim,” Loretta i tok. Loretta i salensim ol narapela meri insait long kantri olsem ol i no ken tingting long marit hariap na bagarapim laip bilong ol. “Planti Saina kampani i kam insait long kantri na invest olsem na planti meri i mas go long Saina na stadi long helpim kantri i divelop,” em i tok.

Loretta i gat bikpela tingting olsem wanpela taim bai em i kamap namel meri insait long luksave bilong PNG na Saina na mekim bikpela senis long divelopim gutpela rilesensip. Founding Dairekta bilong EPA, Jeffers Teargun Heptol i tok ogenaisensen bilong em i bin helpim 17 sumatin bilong PNG, Fiji na Afrika husat i stadi long Saina na em i laik helpim moa.

“Mi save givim strongpela toktok long planti meri i mas go ovasis na stadi na kisim save long strongim famili na kantri. Loretta em mipela lukim olsem wanpela strongpela meri na mi helpim em,” Jeffers i tok.

Mista Heltol i tok EPA i gat bel long helpim ol sumatin i feil, no gat skul fi, nogat sans long go ovasis na askim planti meri long skul na senisim laip. Loretta i tok tenkyu long Mista. Heptol long helpim bilong em na em i tok tenkyu long Ramu NiCo long givim planti tingting na save long luksave olsem em i mas go long Saina long skul. [WantokNiusPepa]
Share 2 WA Share 2 G+

0 comments:

Post a Comment