You Are Here: Home» hailens , lae , lain , morobe provinsel , polis , wokabaut » Polis Stopim Tulait Tulait Bus long Lae Siti

LAE (MOROBE) - Polis long Lae Siti na Nesenel Rot Sefti Kaunsil i laik stopim ol PMV bas i save kam pasindia long Hailens Haiwe i go kam long nait. Olgeta mas kisim o ronim pasindia long san tasol. Planti i no wanbel long dispela tingting na ol i straik. Bos bilong polis long Lae, Superintenden Iven Lakatani, i tok planti ol draiva bilong tulait tulait PMV bus i no save kisim gutpela malolo long slip olsem na i save kamapim planti birua long rot.

Wanpela gutpela piksa em long wanpela PMV bus i bin kapsait wantaim ful lod pasindia long Baiyer, insait long Westen Hailens Provins long stat bilong dispela yia. Lakatani i tok stopim ron bilong ol PMV long nait em i gutpela long daunim dispela hevi.

Planti ol draiva i go kamap long Mt Hagen na bihain, joinim gen i go long Mendi o Wabag, we i no gat gutpela malolo bilong ol.

“Planti ol draiva i no save gat gutpela malolo. Ol i go kamap long Hagen na senisim ol pasindia na skruim wokabaut i go long Mendi, Wabag o Pogera na ol narapela ples tu. Ol i no givim gutpela malolo long bodi bilong ol. “Bodi i mas malolo. Tasol ol i no save givim dispela malolo na mekim bodi i les olgeta. Dispela i ken kamapim bikpela birua long kar. Mipela mas stopim dispela nau yet,” em i tok.

Bik bos bilong Nesenel Rot Sefti Kaunsil, Nelson Terema, i sapotim tingting bilong Lae polis long stopim dispela nait raun bilong ol PMV bus. Em i tok nau yet, planti hevi bilong birua long rot i save kamap long ol kain PMV draiva i no gat gutpela slip na i save draivim kar long nait. Tasol planti ol bas draiva na papa bilong kar i no amamas long dispela tingting.

Ol i tok ol laik ronim long nait taim tu na i no long san tasol. Long las wik long Lae, planti PMV bas i straik o i no amamas long dispela tingting na rausim olgeta PMV bas bilong ol long Eriku.

Ol i tok i no olgeta i save kamapim kain hevi bilong rot eksiden na ol I laik ron long nait tu. Dispela ron long nait tu i save helpim ol longwe lain olsem Mendi, Tari, Ialibu, Enga, Pogera na ol narapela ples long joinim wokabaut bilong ol taim ol i kamap long Hagen.

Ol no ken go long apinun na nait long Mount Hagen na bihain painim ples bilong slip long taun. Bipo, tulait tulait bus sevis em long ron long Lae i go long Hailans tasol. Nau em tulait tulait bas i ron long tupela ples wantaim, Hailens kam daun long nambis na nambis i go antap long Lae. [WantokNiuspepa]

No comments:

Post a Comment