Mini Gems bai Redim Team PNG bilong 2015 Pasifik Gems

POT MOSBI - Sapos Papua Niugini laik ol spots manmeri bilong ol i redi gut long 2015 Pasifik Gems orait, ol i mas statim ol wok redi bilong ol nau long redim ol dispela pilaia bilong ol. Wanpela rot long redim ol dispela pilaia em long kisim ol i go long ol bikpela intanesenel pilai olsem Pasifik Mini Gems we bai kamap long Septemba dispela yia long Walis na Futuna ailan. 191 manmeri bai makim PNG long dispela pilai we bai gat 145 pilaia na 46 ofisel na medikol manmeri stap insait long en. I gat 8-pela spot we bai kamap long Pasifik Mini Gems dispela na PNG resis insait long dispela olgeta spots. Planti ol spot husat bai go long dispela gem i wok go long planti ol arapela lokol na intanesenel trening kem na kompetisen tu.

Sampela i gat ol development program we i lukluk long ol yangpela pilaia husat bai krismas bilong ol i go bikpela na ol i ken stap long sinia tim long 2015 taim Pasifik Gems i kamap long Mosbi. Tasol long nau yet, lukluk na tingting bilong olgeta i pas long mekim nois long Wallis na Futuna na olgeta wok redi bilong ol tim i wok long kamap klostu long pinis taim bilong ol bipo ol i kalap long balus. Long las wik Sarere, laspela bung bilong tim i kamap long Sir John Guise stedium long Mosbi we Jenerel Menesmen bilong tim i sekim wanwan spot long lukim ol wok redi bilong ol i stap long we.

Planti tok ol i pinisim olgeta pepa wok bilong wokabaut pinis na i wokim tasol ol trening progrem bilong ol nau. Wanwan husat i bungim hevi long stretim paspot i tok ol bai pinis long dispela wik na lukluk tasol long ol arapela samting long ol wik i kam bipo long ol i go. Sef di Misin (Chef de Mission) o bos man bilong Tim PNG, Richard Kassman i tok amamas long wanwan menesa na kosa bilong ol tim long wokhat long lukim olsem ol samting i redi hariap. “Dispela em i bikpela tim na i gutpela long yumi olgeta i wokbung gut olsem bai olgeta samting i ron gut tasol,” em i tok.

Kassman i tok tu olsem Wallis na Futuna i no bikpela kantri na i nogat planti samting i stap long hap olsem i gat hia long Papua Niugini. “Olsem na mi laik bai yupela i mas sekim gut na kisim olgeta samting we yu bai laik long yusim long hap bilong wanem em i liklik ples na sampela samting i nogat long hap,” em i tok. Tasol Mr Kassman i tok ol i noken wari tumas long dispela na i mas lukluk long pilai strong na winim ol medol bilong kantri. “Husat i askim mi save tokim ol olsem mipela i kam long pilai, mipela i no kam tasol long soim pes na amamas o mekim namba nating. “Em i Mini Gems tasol wanem gol medol mipela winim long hap em i gol medol tasol,” Kassman i tok. Long wankain taim, Tim i wok long kisim helpim i kam long ol sponsa bilong en long helpim ol long dispela pilai.

Tupela sponsa husat i helpim ol dispela wik em Trukai Industries na SP Brewery. Trukai givim K500,000 we i kam long Trukai Fan Ran dispela yia long Tim PNG dispela wik Trinda na SP Brewery i givim K100,000 olsem sponsip bilong ol long tim long Fonde, dispela wik tu. Dispela tupelo kampani save amamas long helpim spots na ol i stap olsem tupela bikpela sponsa bilong PNG Olimpik Komiti na Tim PNG tu. Kassman i tok amamas long tupela wantaim na strongim ol long gutpela pasin bilong helpim na wokbung ol i gat wantaim PNGOC na Tim PNG. “Em i no isi long salim bikpela tim olsem i go long ol kain pilai ovais na mipela i amamas long kain helpim yupela i givim mipela,” em i tok.

Tred Maketing Menesa bilong Trukai, Maryanne Hereva, i tok spots em i wanpela bikpela samting we i save kamapim planti gutpela samting insait long komyuniti na ol i save amamas long sapotim. Em i tok ol i laik sapotim nesenel tim bilong PNG long helpim ol spotsmanmeri bilong PNG long pilai long intanesenel level bai ol i ken i gat moa save na strong long pilai agensim ol arapela kantri long kain ol bikpela gem olsem. Jenerel Menesa bilong SP Brewery, Stan Joyce tu i tok ol i gat laik tu long helpim divelopmen bilong spots insait long kantri na dispela em i wanpela rot bilong ol long helpim ol nambawan spotsmanmeri bilong kantri long traim save na strong bilong ol wantaim ol arapela kantri na apim nem bilong PNG long hap tu.

PNG tim bai lusim kantri long Ogas 31 na i go long Wallis na Futuna we ol bai stap na pilai nap long September 13 taim ol i kam bek. Dispela Pasifik Mini Gems na tu Komonwelt Gems long 2014 bai tupela bikpela gem bilong Tim PNG long redim ol yet gut bipo long ol i bungim ol arapela Pasifik Kantri long asples bilong ol yet long Mosbi siti. [WantokNiuspepa]
Share 2 WA Share 2 G+

0 comments:

Post a Comment