Ileksen i Pinis long Ol Provins

POT MOSBI - Niugini Ailans rijen na Sauten rijen i pinisim olgeta LLG ileksen na salim ol rit i go bek long ilektorel Komisen hetkwata long Mosbi. Galp na Westen Provins i salim bek rit bilong ol long Tunde long dispela wik wantaim bilong Motu-Koita Asembli na dispela i pinisim olgeta wok bilong Sauten Rijen. Momase rijen na Hailans rijen i wok yet long ol LLG ileksen.

Long Momase, Morobe Provins i salim bek ol rit long las wik na Sandaun i salim bek long Tunde moning. Madang tasol i no pinis yet wantaim olgeta ileksen wok na i luk olsem ol bai surukim taim liklik moa bilong tripela LLG i pinis long kauntim. Tripela LLG em Josephstaal, Middle Ramu na Raikos LLG na Niyudo LLG long Raikos Distrik.

Long Hailans Rijen, Westen Hailans i namba wan long salim bek ol rit bilong 4-pela LLG em Elektorel Komisina i no bin stopim. Sauten Hailans, Enga, Simbu, isten Hailans na Jiwaka provins bai salim ol rit bilong ol kam bek pastaim long taim bilong rit i pas long 30 Ogas.

Hela bai nidim 10-pela de de moa long pinisim skrutini bilong ol balot na Elektorel Komisin bai toksave long Minista bilong em long dispela. Elektorel Komisina, Andrew Trawen i givim luksave long Sandaun, Galp, Westen provins long pinisim gut ol ileksen bilong ol winim taim bilong pinis 30 Ogas.

“Long planti yia, Sandaun, Galp na Westen provins i save kisim taim long karim aut ol ileksen bilong ol long wanem ol hap bilong ol i no gat gutpela rot na no gat planti man long mekim wok, tasol nau ol i mekim gutpela wok stret,” em i tok. Mista Trawen i tok tenkyu long ol provinsel edministreta wantaim ol eleksen opisa na ol pipel long bosim gut ileksen na long givim mani, trenspot na ol wokman meri long mekim wok.

“Klostu olgeta provinsel edministreta i luksave olsem serim wok tasol i helpim 2013 ileksen bihainim ol agrimen (MOA) ol i sainim na dispela em rot yumi mas bihainim long ol ileksen long kantri bihaintaim,” Mista Trawen i tok. [WantokNiuspepa]
Share 2 WA Share 2 G+

0 comments:

Post a Comment