You Are Here: Home» aiambak , ati wobiro , gavman , OTML , peter o'neill , politik , westen provins » Gavman no Ken Tekova Long Ok Tedi Mining Limited (OTML)

AIAMBAK (WESTEN) - Papagraun bilong Ok Tedi Mining Limited (OTML) i no laikim gavman i tekova long wok maining tasol i laikim gavman long kamap patna na givim sevis long ol pipel long Westen. Ol papagraun i tok ol les pinis long arim tok politiks bilong gavman. Ol tok ol i no kisim sevis bilong gavman moa long 30 yia na tok ol i no laikim gavman long go insait long graun bilong ol na tekova long menesmen bilong main.

Las wik long Aiambak long Midel Fly, ol papagraun i tokim, Westen gavana Ati Wobiro long toksave go long Praim Minista Peter O’Neill olsem ol no laikim gavman tekova long OTML. Ol papgraun i autim belwari olsem gavman i kisim bikpela milien kina taim main i stat long 1982 tasol i no lukluk bek long stretim besik sevis.

Ol i singaut long gavman long go lukim ol ples i bagarap na putim mani na wok patna wanataim OTML, Fly Provinsel gavman na papgraun long stretim ol besik sevis olsem rot, helt na rot.

Ol papagraun i mekim dispela tokotk bihain long Praim Minista Peter O’Neill i go long Tabubil tupelo wik i go pinis na tokaut long ol wokman bilong OTML long gavman bai lukautim menesmen bilong OTML. Ol papagraun i autim belhat na tok, gavman i kisim bikpela mani long OTML tasol ol i no lukim hanman bilong gavman long 30 yia. Ol tok ol lukim OTML olsem gavman long stretim rot, bris, skul na haus sik.

Praim minister Peter O’Neill bin tokaut long gavman bai kisim menesmen bilong PNGSDP na i tok olsem gavman bai tekova long menesmen bilong PNGSDP tasol olgeta wokman bilong main bai stap yet long wok. Mista O’Neill i tok PNGSDP i mekim gut tasol i gat planti samting em i no lukluk.

Praim Ministeri i tok taim gavman tekova, PNGSDP fan bilong OTML bai go long givim sevis long ol pipel bilong Westen Provins tasol. PNGSDP i gat moa long K3 biliEn stap long Tras Akaun na dispela mani stap long akuan long benk long Singapore . OTML nau operetim tupela andagraun maining na wanpela open pit main bilong kopa, silva na gol.

OTML main laip inap long pinis long 2013 tasol menesmen na papagraun na gavman wanbel long surukim wok main go het. Aninit long dispela i lukim OTML na papagraun i kamapim CMCA long putim 6.2 pesen bilong winmani long mekim wok divelopmen.

Dispela winmani em OK Tedi Divelopmen Faundesen i menesim na lukim planti wok kamap long rot, helt , edukesen na bris long givim sevis long ol pipel long Westem. Westen provins em wanpela Afrika long PNG we kain kain sik i save bagarapim ol pipel na planti dai.

No gat rot, helt sevis, skul, gutpela maket na mekim laip bilong ol pipel go hat olgeta. Ol pipel save kisim balus na bot long go long Kiunga na Tabubil long kisim gavman sevis. Dispela em i dia tumas long ples manmeri.. Planti ol viles lida na ol mama krai yet long gutpela rot long go hariap long gavman stesen long kisim sevis. [WantokNiuspepa]

No comments:

Post a Comment