ELCPNG Tresera Noreo Keindip i tok ol Kristen manmeri insait long 10-pela seket bilong Kabwum i bin kam bung long ples Sikam insait long Komba Lokol Level Gavman long Kabwum. Dispela sinod i sta long Ogus 25 na go pinis long Ogus 30. Em i kamap long asples bilong olpela tasol I dai het bisop bilong ELCPNG, Reveren Sir Getage Gam.
Em i tok seket presiden, Boling Komba Presiden Bayuso Basing na ol sinod komiti bilong em i mekim bikpela wok long kamapim dispela wantaim ol kaikai na narapela samting bilong bung. Sampela hetman long het opis long Ampo i go long dispela bung tu. Dispela ol delegesen em Gutnius Dairekta Reveren Binora Yunare na pasto makim het opis i bin go long dispela bung tu.
Ol dispela lain pasto bai kisim sampela taim long Baibel stadi na bungim han long ol narapela samting bilong bung. Wanpela longpela residen bilong Anta long Lae, Kimbun Keindip i tok planti pikinini Sikam i givim han long kamapim dispela bung long ples bilong ol.
“Planti pikinini Sikam i givim helpim long kamapim dispela bung. Ol i baim kaikai na givim mani na sapotim dispela bung long ples bilong ol. Dispela em wanpela bikpela samting na mipela ol manmeri long Sikam i amamas long dispela, “ Keindip i tok.
Keindip i tok ol kaikai bilong stua i kam long balus na ol i go kisim long Konge ples balus. Kaikai i kam long Lae na ol narapela i kam long sip, we ol i go kisim long Wasu i go antap long ples bilong bung long kar. Em i tok tu olsem Waimo bris i bagarap longpela taim bihain ren i bagarapim ol na ol i karim ol samting bilong bung na igo long narapela sait bilong wara.
Keindip i tok dispela bris i mekim na ol lain bilong Komba Lokol Level gavman i no save go save go daun long Kabwum stesen long wokim bisnis bilong ol. Dispela i bris i mekim na laip bilong ol lain long Komba i hatwok tru. [WantokNiuspepa]
0 comments:
Post a Comment