You Are Here: Home» australia , bisnis , kampani , pot mosbi » Operesen Opim Hat kisim helpim long Stimsip

POT MOISBI - Stimsips Treding Kampani i donetim K20,000 long wok bilong Operesen Opim Hat (OOH) Progrem long sapotim ol Australia na PNG dokta nau i stap wokim ol operesen long Pot Mosbi Jeneral Haus sik. OOH tim bilong Australia i bin kamap long Pot Mosbi long Fraide 26 Julai na ol i statim wok bilong operesen long Sande 28 Julai.

Grup Menesing Dairekta bilong Stimsip, Geoff Cundle i bin go lukim ol sik lain husat i kisim pinis operesen na i wok long orait long Wod 7, long Tunde 30 Juali na em i toktok wantaim ol Medikal Tim bilong Australia tu.

Mista Cundle i tok Stimsip bai i sapotim yet Operesen Opim Hat progrem bilong wanem dispela wok em i save senisim laip bilong ol pipel na i save givim ol namba tu sans ken long stap laip. Em i mekim dispela toktok taim em i givim K20,000 sek i go long ol tim dokta bilong Australia.

“Dispela progrem i save kamap olgeta yia na em i gutpela helpim tru long ol sik lain na tu ol lokol dokta long lainim nupela samting long ol wan wok bilong ol long Australia,” em i tok.

Mista Cundle i tok Stimsip sapotim helt progrem we i save givim sans long ol Papua Niugini lain long kisim nambawan helt sevis olsem YWAM Medikal Sip.

“Wankain olsem Operesen Opim Hat, Yut Wit A Misin (YWAM), wanpela Australia Volantia grup tu i ron i go long nambis bilong Galf na Westen Provins na i bringim ol medikal sevis long ol lain long hap husat i no save kisim gutpela helt sevis olgeta taim,” em i tok moa.

Long makim maus bilong OOH tim, Ankol Matty i tok tenkyu long Stimsip long olgeta yia em i save sapotim progrem na em i tok, kain sapot olsem long ol koporet komyuniti tasol i save mekim na ol i nap long kam long kantri long wokim ol operesen olsem. Em i tok Papua Niugini i no olsem ol arapela kantri ol i bin go pinis we ol koporet komyuniti i save amamas long givim bikpela sapot bilong ol long progrem.

Operesen Opim Hat i kamap yet olsem wanpela gutpela stori insait long PNG. Operesn namba i bin go antap long olgeta yia na moa laip i kisim narapela sans long stap laip. Ol Kumul tim bilong PNG yet i statim wok pas long 22 Julai we ol i wok long ol klos kes tasol.

I gat tupela sejen bilong PMGH na ol nes na arapela old dokta bilong mekim ol man slip long operesen i kam long olgeta hap bilong kantri long mekim dispela progrem wantaim tim bilong Australia. [WantokNiuspepa]

No comments:

Post a Comment