Naru i sapotim Asailum Sika dil

POT MOISBI - Toktok long ol Asailum Sika i pairap strong yet long PNG na Australia, bihainim sainim bilong agrimen namel long PNG Gavman na Australia we PNG i tok orait long kisim ol Asailum Sika i kam, na sapos ol i tru tru Asailum Sika, ol bai sindaun long dispela kantri. Planti tok agensim i kamap long dispela dil, tasol i gat sampela sapot long en. Morobe Gavana Kelly Naru i sapotim tingting bilong gavman long kamapim asailum sika prosesing fasiliti long Manus provins.

Na em i askim ol lain husat i no wanbel long dispela agrimen long skelim gut tingting bilong ol pastaim. Em i tok aninit long dispela agrimen Morobe provins bai gat sans long Australia i wokim kamap nupela Angau Memorial Haus sik we bai givim sevis long ol pipel bilong yumi na Lae bisnis komyuniti.

Gavana Naru i tokaut olsem i gat planti gutpela bilong dispela agrimen bikos Australia bai helpim tu long stretim na putim kolta long rot stat long Watarais long Morobe i go olgeta ong Madang.

Em i tok bai i gat ol arapela helpim tu i kam long Australia long helpim Manus provins na tu Lo na Jastis sekta long kantri. Narapela man, Sam Moko bilong Mosbi i tok pastaim long sainim agrimen, i mas gat awenes wok, konsaltesen na luksave namel long tupela grup pastain na bihain ol i wanbel, ol ken sainim agrimen.

Mista Moko it ok dispela Asailum Sika dil em i wanpela piksa i soim olsem gavman i feil long kisim tingting bilong pipel bikos dispela bai gat kikbek long laip bilong pipel. Em i toki PNG Asailum Sika dil i olsem tasol Australia i baim narapela kantri long rausim ol bikpela hetpen bilong em.

Em i tok bikos planti pipel long PNG i nogat gutpela skul na ol i no klia tumas long ol samting, pipel i no wokim planti toktok long en. Em i tok bikos ol no bin paitim toktok long dispela samting long bPalamen o ausait, planti i bin kirap nogut taim tupela lida i sainim pinis. Mista Moko it ok moabeta gavman i kenselim dispela dil na noken kisim tu mani8 i stap insait long agrimen inap ol pipel bilong dispela kantri i wanbel long em. Emi tok Australia i save long wok gavanens na menesmen level moa yet, long ol divelopmen fan. Em i tok Australia i putim kondisen long rot bilong PNG Gavman i yusim mani long en i bikpela samting.

Long wankain taim, Peter Gary em i dairekta bilong Milenium Gud Govanens Oganaisesen na wanpela maus man bilong NGO i save bes long Pot Mosbi, na Goroka i tok ol Asailum Sika long PNG i mekim PNG olsem wanpela ples bilong tromoi rabis bilong Australia. ‘Praim Minista i mas save olsem PNG i gat ol hevi bilong em yet. Sapos yu lukluk raun, bikpela populesen bilong PNG i nogat inap mani na sampela i wok long raun nating long strit.

“PM i mas inapim laik na nid bilong ol lain bilong em yet, pastaim long em i ken givim kaikai long ol refuji bikos ol dispela lain i kam ya em ol muslim na ol teroris na Australia em i save gut long dispela. Ol bai tanim na kilim yumi ken,” Mista Gary i tok. [WantokNiuspepa]
Share 2 WA Share 2 G+

0 comments:

Post a Comment