You Are Here: Home» daniel mona , edukesen , goilala open , lain , skul , yuniversiti » Mona bai peim projek fi long ol Goilala sumatin

Memba bilong Goilala Open, Daniel Mona i tokaut olsem em bai peim olgeta projek fi bilong olgeta Goilala sumatin i save skul long ol NCD skul stat long elementeri i go i nap long Yunivesiti.

Em i tok aut long dispela long taim em i bin kamap long Kila Kila Sekonderi Skul Kalsa So long makim O’Neill-Dion gavman na ol arapela memba bilong NCD na Sentral Provins.

Mista Mona i tok em i laik helpim olgeta pikinini bilong Goilala long skul bilong ol bikos, ating long Sental Provins na Papua Niugini, ol lain bilong em long Goilala i kam las tru.

Em i tok strong long ol Goilala sumatin long taitim bun na go het yet. Long wankain taim, Mista Mona i tokaut olsem Septemb 16, indipendens De, Goilala distrik bai holim wanpela bikpela Kalsa So long Tapini Stesin.

Em i salim singaut bilong em i go long ol brata bilong Sentral Provins olsem ol Kairuku, Hiri na Abau long kam na bung wantaim.

“Yumi mas stap olsem Yunaitet PNG na kamap wanpela lida kantri long Pasifik na wol tu,” Mista Mona i tok. Em i tok dispela wik em bai peim olgeta projek fi bilong ol Goilala sumatin long Kila Kila Sekenderi Skul. [WantokNiuspepa]

No comments:

Post a Comment