You Are Here: Home» edukesen , gembogl , helt , laip stail , simbu provins » Man bilong Gembogl Distrik i ken Mekim Planti Wok

GEMBOGL (SIMBU) - Apos wanpela man o meri i gat 10, 50, 100 o 200 skil o save long mekim ol kain kain wok, ating dispela ol namba bai no inap, long wanem, wanpela man i gat 207 skil na save i go pas long olgeta arapela lain. John Rubi Boggre em i wanpela asples man bilong Kir haus lain long Gembogl Distrik, Simbu Provins em dispela man husat i gat 207 skil o save long mekim ol kain kain wok.

Planti long ol ddispela skil em long mekim ol wok long sait bilong self rilaiens o wokim ol samting long strong na save bilong yu yet. Wantok i sindaun na stori wantaim Boggre na askim sapos em i bin go long skul o long wanem rot stret em i kisim dispela skil. Long bekim, em i tok em i no bin go long wanpela skul. Em i tok ol dispela ol skil o save bilong ol kain kain wok em Papa God yet i givim long em.

Na taim em i stap long ples long Promis Len, dispela ol save i wok long divelop long tingting bilong em, na em i stat long yusim long kamapim ol samting long we bilong em yet. Namba wan samting em i traim long en em sigarapim taro na kaukau, miksim, mekim kamap olsem skin na bekim long aven. Na bihain long em i kuk, teis bilong em olsem braun bret.

“Mi no bin go skul, na mi no gat gutpela edukesen, tasol save i kilim mi long wokim ol kain kain samting. Na mi tok tenkyu i go long Papa God long gutpela long mi na givim dispela ol save long mi,” Boggre i tok. Em i tok taim em i kirap na wokim planti samting i kamap long ples bilong em, toktok i go aut na planti ol lain long Simbu i stat long painim em i bikos ol i tingting long yusim ol save bilong em long trenim ol arapela manmeri.

“Taim ol manmeri i kirap na painim mi, ol opisa bilong Simbu Provinsel Gavman tu i painim mi. Na ol i kisim mi i go long Kundiawa na givim wanpela opis spes long mi. Long opis i no gat ol samting long wokim na mi stap tasol.

“Mi no kisim pe tu inap long 15 krismas mi stap long dispela opis bilong gavman. “Tasol wan wan taim, mi bin go aut long givim trening long sampela grup long Westen Hailans husat i bin askim mi long go antap na trenim ol.

“Em tasol mi ken tingim tasol planti arapela taim, mi save westim nating tru long opis long Kundiawa,” Boggre i tok.

Em i tok taim em i stap nating long opis, dispela ol save i wok long divelop na long wankain taim, em i kisim tingting long wanem hap tru em bai go na skelim dispela ol save em i wok long kisim na putim i stap long tingting bilong em. Taim dispela kain tingting i kamap, wanpela tingting i kam strong tru olsem em mas lusim Kundiawa na go long Goroka, biktaun bilong Isten Hailans.

Em bikos dispela provins i gat wanpela ogenaisesen i stap long kisim em, na mekim gutpela yus long ol save bilong em. Boggre i tok taim dispela strongpela tingting i kisim em, em i lusim opis na go bek long promis len ples bilong em long Goroka. Em i painim K30.00 bas fe mani na peim PMV bas na go daun long Goroka.

“Mi kamap long Goroka na bikos mi no gat ol wantok long helpim mi, mi go daun long Faniyufa stoa lain na long tripela de na nait, mi bin slip kirap long hap.”Boggre i tok. Em i tok bihain long slip kirap long hap, liklik brata bilong em i kamap na tokim em olsem, “inap long slip kirap nau, tude bai mitupela i go raun na painim wok.”

Olsem na em i kirap na wanbel, na tupela i go painim wok raun long Goroka taun. Planti ol lain husat i gat ol bekeri i bin soim intres long kisim em, tasol ol i bin askim em long refrens pepa na em i n ogat. Tasol em i no bisi long wok long ol lain husat i save askim tumas long ol refrens na ol pepa bilong wok. Long save bilong em, olgeta referens na pepa long wok i stap insait long het na tingting bilong em.

Tupela i raun painim wok, tasol ol i no kisim wanpela wok. Taim tupela i wokabaut yet, wanpela tingting i kamap na brata bilong em i kirap na tokim em olsem, i gat wanpela ples em i stap we tupela bai go na sekim pastaim bipo long tupela i go long haus. Na dispela ples em opis bilong Mercy Works Sisters long Goroka. Taim tupela i go long dispela opis, tupela lukim Sista Maryanne Kolkia husat i dairekta bilong Mercy Sisters. Long toktok tasol, Sista Maryanne i luksave olsem Boggre em i raitpela man long apim na daunim i go daun planti wok (work load) bilong Mercy Works.

Taim ogenaisesen i givim tok orait long Boggre long kamap olsem wanpela trena long trenim ol manmeri, em i amamas tasol na tok tenkyu long Papa God olsem em i givim stia long em long kamap long Mercy Works Trening Senta. Boggre i tok insait long 7-pela mun long wok olsem trena, em i amamas tru bikos em i nupela ples bilong wok na em i no olsem long Simbu we em i save sindaun nating na driman long opis i stap.

Maski sapos em wanpela hauslain man tasol, em i kirapim pinis wanpela pis pon long promis len ples. Nau yet, pis pon i ron na kamap gut long saplaim abus na tu lukautim famili bilong em. Mani em i kisim long salim ol pis em i yusim long baim ol samting long ol stua.

Boggre i tok tenk yu long Mercy Works Sisters na Sista Maryanne long luksave na kisim em, na kamapim em olsem trena long skulim ol narapela wantaim 207 skil na save bilong em. [WantokNiusPepa]

No comments:

Post a Comment